陳美齡肯定受港媽歡迎

坊間傳居日演藝陳美齡會做香港新一任的教育局局長，使近日成為熱門話題，現在不是談這傳聞是否真確，倒不如談談她做教育局局長的話，有什麼人會喜歡。

當然你是黃絲的話，自然不會喜歡，反對佔中喎，你邊會認同呀。所以可以不理這個論調，因為其他人一定會好Buy。

就係港媽。

陳美齡在港媽心中，簡直係完美典範。先是年齡，她今年六十一歲，在香港出道，在日本成功及結婚甚至生活，連結婚個伙朗係安倍晉三，你話幾勁。如果你是五十幾歲的阿媽，有個剛剛大學畢業既仔的話，這批父母，相信是看陳美齡長大，這種情意結當然有啦，倘若做局長，在認知上肯定是最高，你個昔日偶像做局長，幾有親切感。試想佢去學校做下Road Show然後同你唱「說一聲香港、香港。」嘩，阿爸阿媽真係當睇緊演唱會咁滯。

再講學歷、背景，她擁有博士學位，真係難得，這種Role Model自然心理投射啦。再加上可以嫁到外國去，係外國生活，不用在香港捱，打入日本人市場，這個職場經歷，無疑是屈機，港媽自己不能走出香港，但偶像可以，甚至多期望自己個女可以嫁到外國，同親朋戚友炫耀一番。當自己子女或者個孫仔拿著外國護照，真係高人一等呀，當然你要同時要強調自己好愛國，咁樣先得喎，否則唔夠離地，咁你就唔夠Class呀。

再者留意今天港媽視陳美齡係自己人，點解?大家都視個仔唔識講廣東話、唔識中文為榮呀。你係街見到個阿媽問個仔，「飲唔飲Milk呀?」「咁樣Dirty架。」「佢唔係好同人講中文，唔知點解佢淨係喜歡講英文同睇Story Book。」，阿媽個樣非常之沾沾自喜暗爽，係咪好似曾相識呢?仲要陳美齡既仔入讀美國著名大學學府，真係贏在起跑線上，你試問港媽見到陳美齡做教局局長，仲唔起跳Yeah一聲咩。

陳美齡做唔做局長其實不是一個討論議題，而是今天港媽一方面佢會同你講我想個仔有個快樂的童年，唔好咁Chur，但一個另轉頭佢會同你買十本補充練習過仔去操到冇得訓。然後鬧TSA有幾唔好，但然後問老師做咩唔操下佢地個仔以備日後公開試做準備，其實可能得個一年級都唔定。

港媽其實好香港人的性格，心個句同口個句永遠唔會Sync，就是口裡說不，身體卻很誠實。當你同佢講唔好迫到細路咁，佢地苦口婆心話我都唔想，但形勢迫到你咁架，入唔到名校，考唔好個DSE，前途冇架啦，我又唔係好有錢，供唔到個仔去外國讀書，咁有乜計呢?讀唔到神科，佢走去讀個二打六Degree，出來都唔知搵乜工，講理想都要搵食架，最後咪又係要我養，我已經比唔到首期佢買樓，我依家仲要供緊，我唔想佢大過日後怨我做咩唔迫我讀書，搞到我入唔到港大醫科呀，你明唔明呀。

這就是今天「說一聲香港」。