隱世良心粥店

這個標題好像很誇張，點樣隱世法呢?用阿GEM mode話事解，駛唔駛呀? 咁hard sell呀?可能個人覺得這店挺特別有趣。

有日放工很累，想吃點東西才回家，走到灣仔譚臣道，這條街是一條食街，因為這條街仔細細但已經有多間名食店，例如數十年老字號的華南粉麵，又有越南粉火車頭，仲有高檔的蟹膳，一條街仔只有一百米左右都已有三間名食店，都咪話唔特別。

但當晚我沒有走到這三間店，反而是走到一間粥店，名字叫「合記粥店」，我想進入這店並不是知道好不好吃，而是當時店裡很少人，夠靜，還可以坐係街外，靜靜地吃碗粥，舒舒服服都幾好呀，我就這樣坐低。

我叫了一碗生滾牛肉粥，同一碟油炸鬼。

粥底很有家的味道，並不糊口的漿糊粥，是綿綿的，而且還是爆花的真正有米粥，而牛肉亦很入味。雖然是晚上，但油炸鬼並沒有油益味。而且還見老闆正在做腸粉，即叫即做。我當時心想，你咁認真既?
因為我見這店我未去過，所以我便問開幾點，佢話早六至晚十一。香港地要這樣做先可以維持，租金貴，冇計。
日做十七個鐘!!
埋單只是三十四元，二十六元生滾牛肉粥，八蚊油炸鬼，你要記住係生滾喎!!
而印象最深刻是老闆很斯文，並不粗魯，態度很友善。
咁既價錢係灣仔，當然要記低啦!!

第二次去，我原本是想吃黃鱔粥，但老闆好唔好意思咁話今日冇，咁我就叫碗鮑魚粥豪一豪啦，順便我要多碟炒麵。而鮑魚粥都同樣係二十六蚊，駛唔駛咁抵呀?老闆佢真係比左原隻鮑魚仔過我，再另一隻是剪細等我易入口，一碗粥兩重吃法，如此細心實在佩服，而炒麵成個山仔咁，仲要好味夠香。


吃完後我周圍望望，見到有寫著待用飯券，原來這店有提供待用餐服務，當日記得是寫著3個，數目並不多，我問老闆幾錢一個餐，他說二十四蚊。我便買了個待用飯券。期間有位老婆婆入來買粥，老闆好細心問佢要咩，之後又叫佢小心熱，同埋要唔要配料之類，可見老闆為人友善又客氣，對老人家亦好尊敬。

當時我覺得這店既有人間情，亦有營商之義，實在佩服。


過左一排又去這店，終於可以食到黃鱔粥，真係好正，因為粥底再加黃鱔新鮮，上乘之選。埋單當然又是例牌買了待用飯券，這次我便問了待應阿姐佢地點用，阿姐就話有時會派比人，有時會比一些老人院。

昨日我又去，又買待用飯券，這次阿姐問我不如拿這張待用餐單走，等我自己派比人，但我怕自己唔知點派法，無端端走去比人好像好唐突咁，所以我最後還是將待用餐單留在粥店內。

每次我買待用飯券，老闆同伙記都很熱情笑著多謝，那種感覺並不是虛假，其實我真的想說其實我要多謝你們才對，因為你願意行這一步，其實是好人好事，二十四蚊並不多，但是足夠人溫暖一餐，這一餐除了是給人溫飽，還給了一種愛的關懷，同樣是暖在心頭。


其實我想拍下老闆的容貌，但是我想我已不是記者，這樣拍下人家好像又不大有禮，而且也不知道他是否願意「出鏡」，所以便拍低他工作的一雙巧手。

近日見新聞有關一間在勝利道食店的待用飯券的問題，讓我想起大家可能停一停諗一諗，香港雖然是一個發展成熟的大城市，但是仍有為數不少的階層人士搵兩餐都是有困難。

或者你有日經過灣仔，剛巧又經過譚臣道，或者可以吃碗粥，買多張待用飯券，其實不一定要買好多張，大家只要你又買一張，我又買一張，積少成多，受惠的人就可以更多。

人與人之間的關懷就是這樣傳出去。你所做的事並不是什麼好偉大，不會有人前呼後湧去稱讚你，但幫到人卻是實實在在，是真實而不虛假。

或者下次我買下待用飯券，嘗試自己給予有需要的人，開始行第一步。

合記粥店:灣仔譚臣道8號威利商業大廈地舖