2018年7月6日星期五

奶共也要有點技巧,看《共同家園》MV

人各有志,你有你奶共,佢有佢反共,人有好多種,不一定能夠共融,頂多好勉強和而不同。

即刻MC JIN上身咁款。近日有一首是歌頌大灣區的一首流行曲,叫做《共同家園》,作曲是鄧智偉,作詞是向雪懷。如果純粹以音樂創作上看,這首歌比起上年首特區成立二十周年主題曲《香港.我家》其實係好好多。無咁老土、有點節奏感,時代感多了一些,這是對這首歌以音樂角度上的評價。

至於很多人話這班人奶共,走去唱什麼歌頌大灣區,是很Cheap,很無立場。老實講,作為藝人,你想他們有多高尚呢?唔通個個都係何韻詩、黃耀明、阿澤咩。可能佢地依家回想,都未必再次會肯咁做,因為真係無左個飯碗。係香港地的社會,一直以來搵食大過天從無改變過,你仲想有咩人會真係行出來呀?有的都已經坐緊牢了。

以MC JIN為例,說實話,他只是一名美國人,他來香港或者華人社會,都只是希望有生計,他亦很知道自己定位,還記得當年他為曾蔭權唱歌一樣,你要一個美國人為香港或者中國人爭取一些自由意志,係咪有點強人所難。他寧願寫首歌講美國社會或者可能更加適合。至於盧冠廷,當年民主歌聲獻中華作的《為自由》,到今天唱這首大灣區歌,其實你當佢係一名大中華膠也不出奇,正如鄺美雲做左政協,都即時係訪問話唔好再講以前六四,作為政治人唔講政治,唔係好搞笑咩,咁盧冠廷唱首大灣區歌,有幾咁出奇。

反而如果大家真心有睇個MV,真真正正的問題是出現了兩位人,才是使整個MV以及這個所謂歌頌大灣區的Project一大敗筆。就是無厘頭有樂易玲的出現,個畫面係同MC JIN一齊,以及曾志偉的出現,再到後尾字幕出了感謝樂易玲同曾志偉。

樂易玲是一個幕後人,她的功能就是為這個項目一些管理執行工作,而並不是出鏡。如果要多謝,字幕都已經出左,為何硬要她入鏡呢?其實這是一個很大的問題,並非挑骨頭。而是這種是反映出這個香港的娛樂產業係人治而非能力才勝任。每人各有自己的崗位,幕後歸幕後,幕前的就盡力演出和演唱,樂易玲的出現,是一種奉承老闆、高層的表現。同樣地曾志偉的出現,也實屬不必要。

如果想一些年輕人走進大灣區發展,我們是需要有一個良好的環境,要有一種吸引力才能夠成功,才能夠「打造(要學呢種Tone)」大灣區未來發展之勢。當中唯才是用是一個最緊要的基礎,而不是圍威喂,「你識李總呀?得,比個位你」「我是王幹部個仔就有著數」「你是高官個仔當然有位比你啦!!」這是今天香港年輕一輩最討厭,最憎今天中國環境的裙帶文化,但係偏偏呢個MV真係非常極之突顯左呢個問題所在,樂易玲同曾志偉的出現,心諗係「你係度做乜鳩呀?」

推行一個項目,軟性宣傳,並不是唱首歌就可以成功,當中如何有效地傳送到一個訊息予年輕人是異常重要,你想統戰,也需要有高明的人去做,否則是有反效果。你要奶共都要奶得高明,要有技巧。這次分明是一批與時代脫節,還仍然吃著所謂「自己人」文化做宣傳推廣,到頭來是一個敗筆。又咁講,可能這班人心諗都唔介意有無宣傳之效,係咪成功入屋,只求搵到食,圍威喂一下,理得你國家什麼大發展大機遇,自己有錢就係機遇。歌詞入面有句什麼「推開心窗的世界更大」,他們想法也不會這麼偉大囉,仍然黃子華金句「搵食姐,犯法呀?」呢種層次。

沒有留言:

發佈留言

LinkWithin

Related Posts with Thumbnails